NPA miðstöðin tekur þátt í Freedom drive

Frá 24. til 28. september 2017 mun fjöldi fatlaðra einstaklinga og stuðningsmenn þeirra víðsvegar að úr Evrópu sameinast í Brussel til þess að vekja athygli á réttindum fatlaðs fólks til sjálfstæðs lífs. Viðburðurinn er haldinn á vegum Evrópusamtaka um Sjálfstætt líf (ENIL) og kallast ENIL 2017 Freedom Drive.

NPA miðstöðin mun senda sína fulltrúa á Freedom Drive til að styðja við baráttu fatlaðs fólks í Evrópu og deila reynslu fatlaðs fólks á Íslandi með þátttakendum. Er þetta í fyrsta sinn sem NPA miðstöðin tekur þátt í Freedom Drive en að mati miðstöðvarinnar er mikilvægt að taka þátt í þessari baráttu en eins og kunnugt er hefur rétturinn til sjálfstæðs lífs ekki enn verið lögfestur á Íslandi. Umræða síðustu daga um lögfestingu á notendastýrðri persónulegri aðstoð (NPA) hefur gefið fötluðu fólki á Íslandi von um að sá draumur verði senn að veruleika, en NPA hefur verið í innleiðingarferli síðan árið 2010.

Í ljósi stöðunnar í íslenskum stjórnmálum í dag brýnir NPA miðstöðin þingheim til að lögfesta ákvæði um NPA en bíða með lögfestingu á nýjum heildarlögum um þjónustu við fatlað fólk sem þurfa nánari rýni með aðkomu fatlaðs fólks. Ísland hefur skuldbundið sig til þess að lögfesta notendastýrða persónulega aðstoð með vísan til 19. greinar SSRFF. Eingöngu er tæpt ár þangað til nefnd á vegum Sameinuðu þjóðanna um samning SÞ um réttindi fatlaðs fólks (SSRFF) framkvæmir sína fyrstu úttekt á stöðu innleiðingarinnar á Íslandi og því er brýnt að stjórnvöld klári lögfestingu NPA án tafar.

Viðburðurinn Freedom Drive er haldinn á tveggja ára fresti. Þar gefst þátttakendum m.a. tækifæri til að hitta fulltrúa Evrópuþingsins og vekja athyli á mannréttindum auk þess að deila reynslu og hugmyndum með öðrum mannréttindafrumkvöðlum og aktívistum frá ólíkum hornum Evrópu.

Freedom Drive nær hámarki miðvikudaginn 27. september þegar þátttakendur munu ganga um miðborg Brussel, frá Evrópuþinginu til Framkvæmdastjórnar Evrópuráðsins, til að senda ráðamönnum og stefnumótendum í málaflokknum skýr skilaboð um mikilvægi jafnra mannréttinda, jafnra tækifæra, borgaralegra réttinda og sjálfstæðs lífs fyrir fatlað fólk í Evrópu.

„Freedom Drive kröfugangan er leið fyrir fatlað fólk til þess að gera sig sýnilegt fyrir ákvörðunarvaldhöfum í Evrópu og tryggir að okkar réttindi og okkar málefni séu tekin alvarlega.“
- Zara Todd, nýr formaður ENIL

Um gervalla Evrópu er fötluðu fólki enn mismunað, þrátt fyrir að Samningur Sameinuðu þjóðanna um réttindi fatlaðs fólks hafi verið við lýði í yfir 10 ár. Hér á Íslandi var samningurinn loks fullgiltur á síðasta ári en valfrjáls bókun við hann, sem kveður m.a. á um miðlægt eftirlit með framkvæmd og innleiðingu samningsins af hálfu sjálfstæðrar nefndar og málskotsréttar, hefur enn ekki verið fullgild. Þá hefur, líkt og áður segir, rétturinn til sjálfstæðs lífs enn ekki verið lögfestur og á Íslandi býr fjöldi fatlaðs fólks við mismunun er varðar sjálfsögð borgaraleg réttindi og nýtur ekki sömu tækifæra til jafns við aðra til þátttöku í samfélaginu.

Kröfugöngunni verður svo fylgt eftir með ráðstefnu sem ber yfirskriftina „Sjálfstætt líf: Rödd fyrir alla!
(e. Independent Living: A Voice for All!)“. Evrópuráðherra atvinnu- og félagsmála, Marianne Thyssen, mun opna ráðstefnuna.

NPA miðstöðin mun deila reglulegum fréttum og myndum frá viðburðinum á samfélagsmiðlum og hvetur alla áhugasama til að fylgjast með.

 

e-max.it: your social media marketing partner

Prenta | Netfang