Fréttir

NPA miðstöðin leitar að liðsauka

NPA miðstöðin óskar eftir að ráða í tvær stöður á skrifsofu miðstöðvarinnar í Hátúni 12. Annars vegar er um að ræða starf ráðgjafa og hins vegar starf bókara eða launafulltrúa.

Ráðgjafi mun hafa það hlutverk að veita væntanlegum og núverandi NPA notendum hjá NPA miðstöðinni ráðgjöf er varðar réttinn til NPA, umsóknarferlið, hugmyndafræðina um sjálfstætt líf, verkstjórnarhlutverkið og um framkvæmd NPA þjónustunnar. Ráðgjöfin nær einnig til aðstoðarfólks NPA notenda hjá miðstöðinni um málefni sem að því snýr. Um er að ræða fjölbreytt og krefjandi starf sem viðkomandi starfsmaður mun fá tækifæri til þess að taka þátt í að móta og þróa. Sjá nánar með því að smella hér.

Bókari eða launafulltrúi mun annast fjölbreytt verkefni er snúa að bókhaldi, reikningagerð, launagreiðslum, eftirfylgni með samningum NPA notenda, innheimtu krafna, bókunum, afstemmingum, gerð reikningsyfirlita o.fl. Sjá nánar með því að smella hér.

Umsóknarfrestur er til og með 1. október 2018 og skulu umsóknir sendar á This e-mail address is being protected from spambots. You need JavaScript enabled to view it.. Allar nánari upplýsingar veitir Hjörtur Eysteinsson skrifstofustjóri í gegnum tölvupóstfangið This e-mail address is being protected from spambots. You need JavaScript enabled to view it.. Við viljum hvetja alla áhugasama til að sækja um störfin og sérstaklega fatlað fólk. Horft verður sérstaklega til þeirra og annarra sem hafa persónulega reynslu af NPA.

 

Lesa >>


Sjálfstætt líf?

Rúnar Björn 080582 4209 IMG 9388Sjálfstætt líf og sameinandi samfélag (inngildandi samfélag/ i.e inclusive society) á við um líf utan stofnanaúrræða af öllu tagi. Það snýst ekki „bara“ um það að búa eða búa ekki í ákveðinni byggingu eða stað heldur fyrst og fremst um sjálfsákvörðunarrétt og valfrelsi yfir allar ákvarðanir á sínu eigin lífi og lífstíl.

Stórar stofnanir, sambýli, þjónustukjarnar og jafnvel almenn heimili geta ekki talist uppfylla skilyrði um sjálfstætt líf hafi þjónustan þar einkenni stofnanaúrræða.
Einkenni stofnanaúrræða eru m.a.:

  • Einstaklingar þurfa að deila aðstoð með öðrum
  • Takmörkuð eða engin áhrif einstaklings á hver veitir aðstoðina.
  • Aðgreining eða einangrun einstaklings frá samfélaginu og þátttöku í því.
  • Takmörkuð áhrif einstaklings á daglegar ákvarðanir.
  • Að einstaklingur ráði ekki með hverjum hann býr.
  • Skortur á sveigjanleika þjónustunnar óháð vilja og lífsstíl einstaklings.
  • Foreldraleg nálgun þjónustunnar yfir einstakling.

Stofnanaúrræði geta vissulega boðið fötluðu fólki upp á ákveðið val og stjórn yfir vissum þáttum en verið takmarkandi á öðrum þáttum. Þannig úrræði teljast þó enn til stofnanaúrræða og geta ekki fallið undir skilgreininguna um sjálfstætt líf.

Með vísan í:

Almennar ábendingar nr. 5 um 19. gr. Samningsins SÞ um réttindi fatlaðs fólks (SRFF) um rétt fatlaðs fólks til að lifa sjálfstæðu lífi og vera þátttakandi í samfélaginuu

Evrópusamtök um sjálfstætt líf (ENIL) fagna lykilleiðsögn Sameinuðu þjóðanna um réttinn til sjálfstæðs lífs

 

Lesa >>


Hátíðarfögnuður NPA miðstöðvarinnar á Evrópudegi sjálfstæðs lífs

Hátíðarfögnuður NPA miðstöðvarinnar á Evrópudegi sjálfstæðs lífs

Evrópudagur um sjálfstætt líf er haldinn hátíðlegur víða um Evrópu, 5. maí ár hvert. NPA miðstöðin hélt upp á Evrópudag sjálfstæðs lífs og lögfestingu notendastýrðrar persónulegrar aðstoðar, 5. maí síðastliðinn. Hátíðin var haldin í veislusal veitingastaðarins Nauthóls og boðið var upp á veitingar. Hátíðin hófst á dagskrá sem sjá má hér fyrir neðan og í framhaldinu tók við skemmtileg stund þar sem var mikið spjallað og skrafað.

Meðfylgjandi myndir voru teknar á hátíðinni af Erni Eyjólfssyni ljósmyndara.

Lesa >>


Jafningjafræðslu- og kynningarfundur á Akureyri

Jafningjafræðslu- og kynningarfundur á Akureyri

Er NPA fyrir mig? Hvað gerir NPA miðstöðin? Svör við þessu og fleiru fást á jafningjafræðslu- og kynningarfundi NPA miðstöðvarinnar sem haldinn verður á Akureyri í næstu viku.

Hvenær? Næsta þriðjudag, 12. júní kl. 16:30.
Hvar? Lions salurinn, 4, hæð, Skipagötu 14 (Alþýðuhúsinu).
Aðgengi? Lyfta í húsinu og aðgengi fyrir fólk í hjólastólum.

Í kjölfarið verður unnt að bóka sérstakan fund með fulltrúum NPA miðstöðvarinnar sem færu fram daginn eftir, miðvikudag.

Lesa >>


Viltu bætt aðgengi í hverfinu þínu?

Viltu bætt aðgengi í hverfinu þínu?

Hverfið mitt er verkefni á vegum Reykjavíkurborgar þar sem hugmyndum íbúa hverfa borgarinnar er safnað saman á samráðsvef og í framhaldinu fer fram kosning um hvaða verkefni borgin skuli framkvæma.

Verkefnið er góð leið fyrir íbúa borgarinnar til að hafa áhrif á sín hverfi. Jafnframt er það tilvalinn vettvangur fyrir fatlað fólk til þess að koma hugmyndum sínum á framfæri opinberlega og hafa áhrif á sitt hverfi t.d. er varðar aðgengismál.

Hugmyndasöfnunin fór í gang þann 27. febrúar og stendur til 20. mars.

Hér má sjá helstu upplýsingar um verkefnið Hverfið mitt þar sem hægt er að senda inn hugmyndir, deila hugmyndum, líka við og kjósa um hugmyndir og rökræða þær.

Lesa >>



Fréttasafn

e-max.it: your social media marketing partner